Iam so sad

I can not understand anything anymore

every thing became strang + unexpected + unusual+ unfair + wrong

 

but :

“   I am not afraid of standing alone ,because ‘allah’ is beside me”

شايله هم الاختبارات وماوراء الاختبارات ..

متضايقه مره..

ابي استمتع بوقتي الحالي..

ابي اعيش كالاميره..

ابي اكون فاضيه طول اليوم..

ابي اسافر لكوريا ..

برب بلا عوده لهذا الموضوع مره اخرى ..

ماادري وش اقول لكني اليوم قمت الصباح وانا تعبانه وظهري يعورني ورجولي تعورني وراسي بعد..معرفش ليه؟؟؟

يمكن لاني ركضت امس بقوه ..

الالم هذا يذكرني بالم الزكام ..

 

الله يشفيني..

 

كنت اقول اني مااحب احد يركز اهتمامه علي او بمعنى يهتم فيني..يعني مااحب اعلم احد اني عندي اختبار عشان ما يقعد كل شوي يسالني ولا احب اعلم احد اني مريضه عشان مايقعد كل شوي يسالني كيف حالك ..وما احب وما احب  .. حسنا لقد كنت اكذب في ذلك :

1/كنت مااحب اعلم احد ان عندي اختبار لان اصلا محد راح يهتم + اذا قال لي ابوي شئ وقلت له ان عندي اختبار يزعل ويعصب + اذا قلت ان عندي اختبار انكرف ذاك اليوم في المطبخ مع ان كل اللي في البيت فاضين + اذا قلت لاحد ان عندي اختبار يعصب مني معرفش ليه ..طيب انا عندي اختبار وحتى لو ماذاكرت يعني اكيد نفسيتي زفت يعني خلوني لحالي ..هذا والمفروض ان الشخص اللي يقول ان عنده اختبار المفروض اللي حوله يوفرون له الجو المناسب .. لكن تعرفون ان الموازين انقلبت هذي الايام ..او احتمال انها بعد ماانقلبت في العالم لكني متاكده انها مقلوبه ببيتنا

2/مااقول اني تعبانه لاني ابي اتصرف على حريتي ..يعني اذا قلت اني مريضه اصلا محد بيساعدني (الا امي الله يجزاها خير ويدخلها الجنه بلا حساب ..اذا قلت لها اني تعبانه ولا شئ يعورني على طول تسوي لي اكل او تعطيني او اي شئ ..اهتمامها بس فيني يخليني انسى كل الالامي ) ..اما الباقين بيقولون لي روحي كلي كذا او اشربي كذا عشان يخف الالم ..طيب مشكورين على النصيحه.

 

نفسي اجرب ان احد يهتم فيني ..نفسي اصير محور حياة احد ما ..

ابي احد اذا قلت له نفسي في كذا او كذا على طول يحققه لي ..

 

الله يرزقني السعاده بالدنيا والاخره ..ويجمع شملنا قريبا ..

 

قبل شوي شفت بالجزيره الوثائقيه برنامج عن الحيوانات وكان فيه غزال وولدها الصغير …المهم ام الغزال هذي شافت فهدين جايين يبون يصيدون..وولدها كان غير مايمديه يركض فخلته يتخبى بين الاشجار وهي راحت تمشي قدام الفهد عشان تلفت انتباهه عن ولدها ..المهم الفهد شافها وقام يلحقها وهي ركضت باقصى قوتها بس في الاخير مسكها الفهد وقتلها .. وولدها المسكين الى الان قاعد متخبي  ينتظر امه متى ترجع ..تخيلتوا المنظر ..ضحت بحياتها عشان ولدها ..ضحت بحياتها عشان ولدها!! ولدها كان المرتبه الاولى بقلبها ..تركت كل شئ بذا الدنيا عشان ولدها؟؟ مع انها حيوان مايعقل ..

 

حقا انه منظر يحرك مشاعرك بعمق..

 

 

تتوقعين ولدها بيذكر معروفها هذا طول عمره ؟؟

اتوقع انها حتى لو كانت تعرف ان ولدها بينساها وماراح يتذكرها حتى لو ضحت بحياتها ..ماكانت راح تتردد ابدا في التضحيه بحياتها حتى لو كان ولدها بينسى حتى لو ماعرف ولدها بالسالفه ابدا ..تدرون ليه ؟؟ لانها تملك قلب الام

الخوف يملأ جوانبي .. انا مرتعبه ..

تخيلوا شكلي ..صغيره ..مسكينه ..ترتجف يداها من الخوف ..وينبض قلبها بشده..وطبعا لا يوجد من البشر من يواسيها ..

 

اللهم ارزقني الامان والاطمئنان..

ماادري وش اكتب؟؟ بس ودي افضفض لاحد ..طبعا اكيد مااقدر افضفض للي عندي لانهم وببساطه مايهتمون ..حتى هنا مااقدر اكتب بحريتي ..

المهم ماعلينا ..اهم شئ اكتب اللي براسي..

وش اللي براسي؟؟

الصراحه انا خايفه اني مااكون اجتماعيه ..يعني الحين لو اقعد مع زميلتي اللي اعرفها من سنين مااعرف اسولف لان اصلا ماعندي سواليف ولا ااعرف اخترع واتكلم مثل البنات مثلا انا وزميلاتي الثلاث اذا قعدت معهم يسولفون باشياء اعرفها واقدر ادخل معهم بالسوالف بس مااعرف ..مااعرف اتكلم ..مااحب اركب الكلام ..مااعرف اقول السوالف بصيغه مشوقه مثلهم ..

يعني بس اقول الزبده وباختصار شديد

والله هم ..شايله هم ذا الشي مره مره ..والمشكله ماادري وشلون اطوره السوالف عندي !!

يعني حتى لو شكيت لاحد عندي محد بيعطيني وجه ..اووووووووووف

ابي بس اكون انا..ابي اعبر عن نفسي براحتي ..ماابي اشيل هم كلام الناس ولا افكار الناس ولا الخرابيط الباقيه ..

عارفه ان كلامي مقطع لاني اي فكره تجي براسي احطها

الحين شعوري ..هو الخوف..

خايفه لان عندي اشياء كثيره وواجبات كثيره واختبارات كثيره (وانا صراحه حاليا مالي رغبه بالمذاكره البته )وخايفه لان عمري فوق 21 والى الان مااعرف احط مكياج مثل باقي البنات ولا اعرف اعتمد على نفسي باختيار الملابس ..

تصدقون اني ماحضرت عرس الا مرتين بحياتي ..

طيب تصدقون ان ماعندي الا فستانين ..

طيب تصدقون اني مااشتريت ملابس للعيد من حوالي 6 سنوات (ليس بسبب القصور الماادي والحمدلله ولكن لاننا وببساطه مانعيد مع احد ..يعني عيدنا بيبيتنا وبالنسبه لي غالبا يكون علي المطبخ يوم العيد عشان كذا يكون عيدي بالمطبخ )

برب

باك

رحت اسمع اناشيد باليوتوب ..المهم نرجع لمحور حديثنا ..

ذا الايام طحت طيحه بالافلام الكوريه واليابانيه ..احسهم رهيبين شخصياتهم واضحه وطيبه وصادقه +مايتدخلون بشؤون الاخرين وهذا اهم شئ يعني الحين نفسي اشوف اي شئ كوري او ياباني مررررررررره مررررررررررره ..بس عيوني تعورني من الكمبيوتر ولذلك ساااجله الى يوم اخر .. ودي ان عندي هادرسك 500قيقا كله مليان مسلسلات شرق اسيويه مترجمه عربي طبعا ..

احيانا افكر لو معي سياره واقدر اسوقها وش بسوي؟؟ ..لو معي راتب وانا اللي اتحكم فيه وش بسوي ؟؟العلم عند الله وحده سبحانه عالم الغيب والشهاده

 

ودي اكتب واكتب ..بس مدري وشلون ابدا >>اجل اللي فوق هذا كله وش تسمينه ؟؟!!

المفروض اني اروح اقرا قران وارقد بس احس اني ابي اقعد لحالي ورتب افكاري ..ومافيه وقت يتوفر لي فيه هذا الشئ الا بالليل ..

ابي ارتب وش المهم في حياتي ..ابي اعيد ترتيب اولوياتي ..ابي اوسع تفكيري ..ابي اشياء كثيره

 

 

يارب سهل امري ووفقني وارزقني حسن الخلق

 

اتمنى اني اقدراعبر عن مشاعري ..

اتمنى اني اقدر استفيد من اللي اشوفه..

اتمنى اني اقدر استغل كل لحظه بحياتي..

اتمنى اني اصير شجاعه بقراراتي..

يارب اهدني ..اللهم اني اسالك رضاك والجنه..

وش معنى الحب ؟؟

هل هو صدق ؟؟

امنيتي لهذا الاسبوع :

اتمنى ايش حياه مرفهه ..حياة ملوك ..يعني اصير اميره ..المهم ابي اصير اميره لمده شهر ..واذا عجبني الوضع اقدر امدد ذا الشهر ..اما اذا ماعجبني فاقدر ارجع لحالتي الطبيعيه